Համեմունքներն ու առողջությունը

Այսօր դժվար է պատկերացնել խոհանոց` առանց համեմունքների: Թերևս յուրաքանչյուր տնտեսուհու «մարտի դաշտում» կարելի է  տեսնել համեմունքներով լի բազմապիսի, բազմաբույր  ու գույնզգույն տարաներ: Եվ այդ բոլոր համեմունքները կարող են ոչ միայն հաջողությամբ կիրառվել ուտեստների մեջ, այլև օգտակար լինել մեր ու մեր մերձավորների առողջության պահպանման գործընթացում։ 

Տեսնենք, թե ինչ օգտակար հատկություններ ունեն դրանք:

Եղեսպակ (շալֆեյ)

Օգտակար է մտավոր գերհոգնածության դեպքում, բարելավում է հիշողությունն ու ուշադրությունը: Բերանը եղեսպակի լուծույթով ողողելով` կարող եք կանխել մրսածության հետևանքները:  Այն նվազեցնում է  կլիմաքսին բնորոշ արյան «մակընթացությունը»:

Կիրառումը. թուրմի համար հարկավոր է 1-2 գդալ եղեսպակի չոր հումքի վրա տաք ջուր լցնել ու թրմել 10 րոպե: Կլիմաքսային «մակընթացությունների» դեպքում պետք  է խմել օրական 3 անգամ` սառը, մնացած  ժամանակ` տաք վիճակում:

Քրքում

Այս համեմունքի հայրենիքը Հնդկաստանն է, որտեղ այն  համարվում  է երիտասարդությունն ու գեղեցկությունը պահպանելու միջոց: Բացի այդ, քրքումն օգնում է  նվազեցնելու այտուցներն ու հոդատապից առաջացած ցավերը, բուժելու մաշկի բորբոքումները:

Կիրառման համար կես թեյի գդալ չոր քրքումն ավելացնել մեկ բաժին ապուրին կամ խաշած մսին: Կարելի է ավելացնել նաև բրնձին (ինչից այն դեղնավուն երանգ է ստանում): Մաշկային բորբոքումների դեպքում պետք է չոր հումքը խառնել ջրի հետ այնքան, որ դառնա մածուցիկ ու  քսել բորբոքված մասերին:

Կոճապղպեղ (իմբիր)

Բարելավում է  արյան շրջանառությունը, օգնում է ցնցումների, մրսածության, կոկորդացավի  դեպքում: Կարող է կիրառվել  սրտխառնուքի դեմ  (նույնիսկ հղիության ժամանակ), խթանում է մարսողությունը:

Կիրառումը. կոճապղպեղը խոշոր անցքերով քերիչով մանրացնել ու  2 ճաշի գդալ հումքը խառնել 1 լիտր ջրին, ապա` եռացնել: Ավելացնել մեղր ու կիտրոն` ըստ ճաշակի:

Դաղձ

Օգնում է գլխացավի ժամանակ, բարելավում է ուղեղի աշխատանքը: Հնուց այն հայտնի է որպես հանգստացնող միջոց, որը թուլացնում է նաև մկանային լարվածությունը, նյարդային անհանգստությունը, բարձրացնում է տրամադրությունը: Կիրառությունը հայտնի է բոլոր հայ տնտեսուհիներին:

Գինձ

Բացում է ախորժակը և բարելավում մարսողությունն ու արյան շրջանառությունը: Օգնում է օրգանիզմից ավելորդ հեղուկի դուրսբերմանը, կարող է կիրառվել նաև որպես միզամուղ միջոց:

Կիրառումը. սրա կիրառումը նույնպես հայտնի է տնտեսուհիներին: Այն պետք է ավելացնել աղցաններին, բրնձով կերակուրներին: Այտուցի դեպքում կարելի է  գինձի եփուկ խմել` պատրաստված հետևյալ կերպ.  2 թեյի գդալ գինձի սերմերը 3 րոպե եփել 200 մլ ջրում ու խմել օրական 3 անգամ:

Պղպեղ (չիլի)

Պղպեղի կծու համը պայմանավորված է կապսայցին նյութով, այն տաքացնում է օրգանիզմը` դրանով արագացնելով նյութափոխանակության  գործընթացները: Այն օգտակար է  վարակների դեպքում, օգնում է հազի ու հարբուխի ժամանակ:

Կիրառումը. քիչ, դանակի ծայրով ավելացրեք այն մսով կերակուրներին:

Դարչին

Գերազանց մաքրում է անոթներն ու նվազեցնում խոլեստերինի մակարդակն արյան մեջ: Դարչինի նույնիսկ չնչին քանակը նվազեցնում է արյան մեջ շաքարի մակարդակը:

Կիրառել թեյի, կեֆիրի ու սուրճի հետ` ձեր նախընտրությամբ: Այն բարելավում է ըմպելիքի համն ու օգտակար  ազդեցություն ունենում:

Հարցեր, պատասխաններ, մեկնաբանություններ